Azərbaycan Dövlət Akademik Rus Dram Teatrının direktoru Ədalət Hacıyev: “Mədəniyyətimizin himayədarı – Mehriban Əliyeva”

Azərbaycan mədəniyyəti tarixin dərin qatlarından bu günümüzə qədər xalqımızın varlığının güzgüsüdür. Hər daşında, hər səsində, hər səhnəsində milli kimliyimizin izi olan mədəniyyətimiz bizi yaşadan, dünyaya tanıdan ən böyük sərvətimizdir. Xalqı tanıdan yalnız torpaqları, sərhədləri deyil, həm də incəsənətidir. Və xoşbəxt xalq o xalqdır ki, onun mədəniyyətinə böyük qayğı göstərən, sənətini sevən və qoruyan rəhbərləri var. Azərbaycan bu baxımdan şanslıdır. Çünki ölkəmizin mədəniyyətinə diqqət göstərən, sənət adamlarını dəstəkləyən, tarixi-mənəvi irsimizi gələcək nəsillərə ötürən bir şəxsiyyət var – Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyeva.

Mədəniyyət sadəcə səhnədə oynanan tamaşa, yaxud da muzeylərdə qorunan əsərlər deyil. Mədəniyyət bir millətin nəfəsidir, ruhudur, yaddaşıdır. Mehriban xanım Əliyeva isə bu yaddaşın qorunmasına, onun müasir dövrə uyğun şəkildə inkişafına və dünyaya tanıdılmasına xüsusi həssaslıqla yanaşır. Bu həssaslıq yalnız bir vəzifənin tələbi deyil, ürəkdən gələn bir sevgi, xalqa və sənətə bağlılıqdır.

Azərbaycan Dövlət Akademik Rus Dram Teatrı ölkəmizin mədəniyyət salnaməsində özünəməxsus yeri olan bir sənət məbədidir. Onilliklərdir bu teatr səhnəsində dünya klassiklərinin, Azərbaycan dramaturqlarının əsərləri canlandırılır, tamaşaçıya düşünmək, duymaq, yaşamaq imkanı yaradılır. Bizim teatr tamaşaçısı heç vaxt təkcə bir tamaşa izləməyə gəlməyib – o, həm də orada milli kimliyinin izlərini, bəşəri dəyərlərin cazibəsini görüb.

Məhz bu baxımdan teatrların yaşaması, inkişaf etməsi böyük məsuliyyət tələb edir. Mənim rəhbərlik etdiyim kollektiv də yaxşı bilir ki, Mehriban xanım Əliyevanın diqqəti olmasa, bu gün teatrlarımız bu qədər möhtəşəm addımlar ata bilməzdi. Onun qayğısı nəticəsində teatr binaları yenilənir, aktyorların beynəlxalq festivallarda iştirakı dəstəklənir, gənc istedadların üzə çıxarılması üçün şərait yaradılır.

Xüsusən də son illərdə teatr sənətimizin region və dünya miqyasında tanıdılması üçün görülən işlər hər bir yaradıcı insanı ruhlandırır. Biz fəxrlə deyirik ki, Azərbaycan teatrı artıq yalnız milli mədəniyyətimizin bir parçası deyil, həm də dünya mədəniyyət xəzinəsinin mühüm qollarından birinə çevrilməkdədir. Bu yolda Mehriban xanım Əliyevanın dəstəyi əvəzsizdir.

Onun təşəbbüsü ilə həyata keçirilən layihələr, klassik sənətə, musiqiyə, teatr sənətinə verdiyi diqqət bizim üçün stimul, tamaşaçılarımız üçün isə bayramdır. Biz aktyorların, rejissorların, yaradıcı insanların arxasında Mehriban xanım kimi böyük bir dəstəyin olduğunu bilmək, bizi daha məsuliyyətli edir.

Mədəniyyətə qayğı – gələcəyə qayğıdır. Çünki mədəniyyətsiz gələcək ola bilməz. Biz bu gün teatr səhnəsində tamaşalar oynayırıq, amma əslində gələcək nəsillərin yaddaşında milli kimliyi qorumağa çalışırıq. Mehriban xanım Əliyevanın bütün fəaliyyəti isə məhz bu amal üzərində qurulub: milli-mənəvi dəyərlərin yaşadılması və təbliği.

Mən, Ədalət Hacıyev, Əməkdar mədəniyyət işçisi olaraq fəxrlə deyirəm ki, Mehriban xanımın diqqəti bizim teatrda da hiss olunur. Tamaşaçılarımızla görüşdüyümüz hər an, səhnədə işıqlar yananda, pərdə açılanda biz bilirik ki, arxamızda bu diqqət və qayğının gücü var. Bu, sadəcə bir rəhbər jesti deyil, bir vətəndaşlıq, bir ana sevgisi, bir mədəniyyət himayədarlığıdır.

Azərbaycanın hər bir teatrında, hər bir muzeyində, hər bir konsert salonunda bu qayğının izi var. Bu gün Qarabağın işğaldan azad olunmuş torpaqlarında da mədəniyyətin bərpası üçün görülən işlər bir daha göstərir ki, Mehriban xanım mədəniyyəti sadəcə indiki gün üçün deyil, həm də sabah üçün düşünür. Qarabağda ucaldılacaq hər bir teatr, bərpa ediləcək hər bir mədəniyyət ocağı Azərbaycanın əbədi kimliyinin möhürü olacaq.

Biz yaradıcı insanlar çox yaxşı anlayırıq ki, bu günün tamaşaları sabahın tarixidir. Ona görə də bizim vəzifəmizdir ki, Mehriban xanım Əliyevanın göstərdiyi diqqəti yaradıcılığımızla, səhnədə canlandırdığımız obrazlarla, tamaşaçıya ötürdüyümüz dəyərlərlə cavablandıraq. Bu həm borcumuz, həm də şərəfimizdir.

Bu gün isə həm də bizim üçün xüsusi bir gündür – Mehriban xanım Əliyevanın doğum günü. Bu münasibətlə Azərbaycan Dövlət Akademik Rus Dram Teatrının bütün kollektivi adından, həm də şəxsi adımla Mehriban xanımı ürəkdən təbrik edirəm. Mehriban xanım, Sizə uzun ömür, möhkəm can sağlığı, fəaliyyətinizdə yeni uğurlar arzulayıram. Siz yalnız Azərbaycanın deyil, həm də bütün dünyanın mədəniyyətinə, bəşəriyyətin mənəvi dəyərlərinə xidmət edən bir insansınız. Biz Sizin varlığınızla fəxr edirik və əminik ki, rəhbərliyiniz və dəstəyinizlə Azərbaycan mədəniyyəti daim çiçəklənəcəkdir.

Hazırladı: Hacı Pərviz Həsənov