“Star Wars”ı dünyaya tanıdan ilk poster satıldı
“Star Wars” (“Ulduz müharibələri”) filmini dünyaya tanıdan ilk poster satılıb.
“Qafqazinfo” xəbər verir ki, 50 il əvvəl “Star Wars” filmini tanıdan poster hərracda 3,875,000 dollara alıcı tapıb.
Belə ki, rəssam və poster dizayneri Tom Yunq tərəfindən 1977-ci ildə akril və aerofırça texnikalarından istifadə edilərək yaradılan poster ABŞ-də “Heritage Auctions”da satışa çıxarılıb.
Filmin nümayişindən iki həftə əvvəl nümayiş etdirilən və yüksək qiymətləndirilən ikonik poster hərracda 3,875,000 dollara alıcı tapıb.
Beləliklə, 1 milyon dollara satışa çıxarılan poster “Star Wars” seriyasına aid ən yüksək qiymətli əsər və bütün film sənayesində ən dəyərli poster olub. Əvvəlki rekord “Star Wars” filmlərindəki cani Dart Veyderin işıq qılıncına məxsus idi və qılınc 3,6 milyon dollara satılmışdı.
Posterin prodüser Qari Kurtsun ofisində asılı olduğu və daha sonra ailəsi tərəfindən satışa çıxarıldığı bildirilir.
Posterdə Lyuk Skayuoker işıq qılıncını qaldırır, arxa planda Şahzadə Leya və yuxarıda Dart Veyderin silueti təsvir olunub.
Posterin digər tərəfində X-wing döyüşçüləri hücum edərkən Han Solo və Skayuokerin medal aldığı göstərilir.
“Heritage Auctions” rəsmiləri rəsmin yalnız bir film xatirəsi deyil, həm də Amerika pop mədəniyyətinin əhəmiyyətli bir hissəsi olduğunu qeyd ediblər. Vurğulanıb ki, “Star Wars” seriyasının qlobal fanat bazası onun satış qiymətinin artmasına səbəb olub.
