Senatorlara şübhəli tozlu zərflər göndərildi - Seçkiöncəsi həyəcan siqnalı

ABŞ-də keçiriləcək ara seçkilərdən əvvəl ştatların seçki rəsmilərinə və bəzi senatorların ofislərinə tərkibində ağ toz olan şübhəli zərflər göndərilib. Federal Təhqiqat Bürosu (FTB) və ABŞ Poçt Xidməti məsələ ilə bağlı genişmiqyaslı təhqiqata başlayıb.

“Qafqazinfo” xəbər verir ki, Pensilvaniya, Ohayo, Aydaho və Viskonsin daxil olmaqla, bir neçə ştatın seçki komissiyalarına yönləndirilən şübhəli poçtlar alıcılara çatmadan müəyyən edilərək götürülüb.

Eyni zamanda, ABŞ Senatındakı Demokrat çoxluğunun lideri Çak Şumer, həmçinin senatorlar Aleks Padilla və Kris Merfiyə ünvanlanan zərflər də poçt xidməti tərəfindən saxlanılıb. Senator Padilla baş verənləri şərh edərək bildirib ki, bu insident ictimaiyyətə xidmət edən və seçki prosesini idarə edən şəxslərin üzləşdiyi real təhlükələrin acı bir xatırlatmasıdır.

ABŞ Nümayəndələr Palatasının və Senatının təhlükəsizlik xidməti əməkdaşlara təcili elektron xəbərdarlıq məktubu göndərib. Bəyanatda Senat işçilərinə şübhəli paketlərə qarşı diqqətli olmaq, poçt markaları ilə qaytarılma ünvanı üst-üstə düşməyən zərfləri açmamaq tapşırılıb. Şübhəli paketlərdən birinin üzərində qaytarılma ünvanı kimi “DSA” qısaltması və Nyu-York ünvanının göstərildiyi diqqətə çatdırılıb.

FTB hazırda zərflərdən çıxan naməlum toz maddəsinin kimyəvi tərkibini laboratoriyada analiz edir.