ISW Ukrayna ilə atəşkəs təklifinə Rusiyanın reaksiyanı təhlil etdi

Qaynarinfo xəbər deyilir. 

Hesabatda qeyd olunur ki, ABŞ və Ukrayna 11 martda Səudiyyə Ərəbistanının Ciddə şəhərində keçirilən görüş zamanı Rusiyanın da razılaşacağı halda Ukraynada 30 günlük atəşkəs elan edilməsi barədə razılığa gəliblər. ABŞ-ın yenidən kəşfiyyat məlumatlarının mübadiləsini və hərbi yardımı bərpa etdiyi bildirilir.  

Ukrayna Prezidenti Volodimir Zelenski bəyan edib ki, atəşkəs bütün cəbhə xətti boyunca döyüşlərin dayandırılmasını, uzaqmənzilli raket zərbələrinə və dron hücumlarına moratorium tətbiq edilməsini, həmçinin Qara dənizdəki əməliyyatların dayandırılmasını nəzərdə tutur və Rusiya ABŞ-ın təklifini qəbul edən kimi qüvvəyə minəcək.  

ABŞ-ın dövlət katibi Marko Rubio 11 martda keçirilən mətbuat konfransında Rusiyanın cavab verməsi üçün son müddətin nə olduğu ilə bağlı suala "mümkün qədər tez" cavabını verib.  

Bununla yanaşı, ISW analitiklərinin bildirdiyinə görə, Rusiyanın ultra-millətçiləri və rəsmiləri atəşkəs təklifini rədd ediblər.  

Kremlyə yaxın bəzi rusiyalı bloqerlər iddia edirlər ki, ABŞ və Ukrayna "ilk fürsətdə" sülhü pozacaq və Ukraynadakı müharibə Rusiya üçün "mövcudluq savaşıdır". Həmin bloqerlər bildirirlər ki, atəşkəsin qəbul edilməsi "xəyanət və sabotaj" olardı.  

Bundan əlavə, Rusiya Dövlət Dumasının deputatı, Rusiya Silahlı Qüvvələrinin 58-ci ordusunun keçmiş komandanı, general-leytenant Viktor Sobolev bəyan edib ki, Rusiya 30 günlük atəşkəsin "qəbuledilməz" olduğunu nəzərə alaraq bu təkliflə razılaşmamalıdır, çünki bu, Ukraynaya yenidən silahlanmaq və qüvvələrini yenidən qruplaşdırmaq imkanı verəcək.  

ISW-nin sözlərinə görə: "Bu hesabat yayımlandığı anda Kreml atəşkəs təklifinə rəsmi cavab verməyib, rus dövlət mediası isə Rusiyanın ABŞ-la ikitərəfli danışıqlar barədə əvvəlki rəsmi bəyanatlarını atəşkəs təklifinə cavab kimi təqdim etməyə çalışır".  

Hesabatda həmçinin bildirilir ki, atəşkəs təklifinin açıqlanmasından sonra Rusiya dövlət mediası Rusiya Xarici İşlər Nazirliyinin sözçüsü Mariya Zaxarovanın 11 martın əvvəlində verdiyi bəyanatı yayıb. Həmin bəyanatda Rusiya yaxın günlərdə ABŞ-la təmasları "istisna etmədiyini" bildirib.  

Rusiya Dövlət Dumasının Təhlükəsizlik Komitəsinin üzvü Mixail Şeremet isə birgə bəyanatın açıqlanmasından əvvəl bildirib ki, Rusiya Ukraynadakı vəziyyətin nizamlanmasında maraqlıdır, lakin aldanmağa imkan verməyəcək. Rusiya dövlət mediası isə atəşkəs təklifindən sonra Şeremetin bəyanatını daha da qabardıb.  

ISW-nin sözlərinə görə: "Rusiyanın dövlət mediası, çox güman ki, Kreml rəsmiləri ictimai bəyanatlar verənə və bu təklifi Rusiya mediasında daha geniş işıqlandırmaq üçün zəmin hazırlayana qədər Rusiyanın reaksiyasını daxili auditoriya üçün mülayim kimi göstərməyə çalışır".  

ISW-nin 11 mart tarixinə dair əsas qənaətləri:  

- ABŞ və Ukrayna 11 martda, Rusiyanın razılığı şərti ilə, Ukraynada dərhal qüvvəyə minəcək 30 günlük atəşkəs barədə razılığa gəlib və ABŞ yenidən kəşfiyyat məlumatlarının mübadiləsini və hərbi yardımı bərpa edib.  

- Avropa, Asiya və Okeaniyadan olan Ukraynanın müttəfiqləri və tərəfdaşları Ukrayna ordusunu gücləndirmək və Kiyevə təhlükəsizlik zəmanətləri vermək üçün səylərini davam etdirirlər. Bu, mümkün gələcək sülh sazişindən sonra Rusiyanın Ukraynaya qarşı potensial aqressiyasının qarşısını almaq üçün ən effektiv vasitə hesab edilir.  

- Rusiya qoşunları Kursk vilayətində irəliləyiş əldə edib və ehtimal olunur ki, Sucaya hücuma başlayıb.  

- 10-dan 11 marta keçən gecə Ukrayna ordusu Rusiyaya, əsasən Moskva vilayətinə, pilotsuz uçuş aparatları ilə genişmiqyaslı hücumlar həyata keçirib.  

- Ukrayna qüvvələri Toretsk və Pokrovsk yaxınlığında irəliləyib, Rusiya qüvvələri isə Severks, Robotino və Kursk vilayəti istiqamətində irəliləyiş əldə edib.  

- Kreml Ukraynada döyüşən Rusiya əsgərləri üçün, o cümlədən 2014-cü ildən etibarən "DXR" və "LXR" separatçı qruplaşmalarının tərəfində vuruşan döyüşçülər üçün sosial imtiyazları genişləndirməkdə davam edir.