Makron Meloniyə qəzəbləndi - “Şərh bildirməyi dayandır”

Fransa Prezidenti Emmanuel Makron İtaliyanın Baş naziri Corciya Meloninin Fransadakı zorakılıqla bağlı şərhlərinə sərt reaksiya verib.

“Qafqazinfo” xəbər verir ki, Makron bunu Hindistanın Yeni Dehli şəhərində jurnalistlərə açıqlamasında bildirib.

“Öz ölkələrində narahat edilmək istəməyən millətçilərin başqa ölkələrdə baş verənlərə ilk şərh bildirənlərin olduğunu görmək məni həmişə təəccübləndirir”, - prezident qeyd edib.

O əlavə edib ki, heç bir ideologiya və ya siyasi fikir zorakılığa haqq qazandıra bilməz. Makron Melonidən başqa ölkələrdə baş verənlərə şərh bildirməyi dayandırmasını istəyib.

Qeyd edək ki, Meloni Lionda solçu və ifrat sağçı qruplar arasında baş verən döyüşdə bir gəncin ölməsini “bütün Avropa üçün yara” adlandırmışdı. Bu, Fransa ictimaiyyətində və siyasi dairələrdə mübahisə yaratmışdı.

Xatırladaq ki, fevralın 12-də Kanten Derank Lionda solçu və ifrat sağçı qruplar arasında baş verən toqquşmada həyatını itirib. Hadisə ilə bağlı istintaq başlanıb.

Yerli təhlükəsizlik kameralarının görüntülərində Lionun 5-ci rayonunda bir qrupun üç gənci döydüyü, ikisinin qaçdığı, üçüncüsünün isə yerdə hərəkətsiz uzandığı göstərilib. Derank başından aldığı xəsarətdən xəstəxanada vəfat edib.