Vaşinqtonda hücuma məruz qalan əsgərlərdən biri öldü

ABŞ Prezidenti Donald Tramp Vaşinqtonda baş verən silahlı hücumda yaralanan iki Milli Qvardiya əsgərindən birinin vəfat etdiyini açıqlayıb.

“Qafqazinfo”nun məlumatına görə, Donald Tramp bu xəbəri Şükran Günü münasibətilə ABŞ hərbçiləri ilə keçirdiyi onlayn görüş zamanı verib.  

Prezident hücum edən şəxsin vəziyyətinin ağır olduğunu bildirib.

Məlumata görə, ABŞ paytaxtında 29 yaşlı Əfqanıstan əsilli miqrant Rahmanullah Lakanval tərəfindən pusquya salınaraq güllələnən iki hərbçidən biri Qərbi Virciniyadan olan Sara Bekstrom aldığı xəsarətlər səbəbindən həyatını itirib.

“Sara Bekstrom – haqqında danışdığımız qvardiyaçılardan biri idi. Son dərəcə hörmətli, gənc və möhtəşəm bir insan… Az əvvəl vəfat etdiyini bildirdilər. Artıq aramızda deyil”, – o bildirib.

Digər yaralı hərbçi - 24 yaşlı Endryu Vulfun müalicəsi davam etdirilir. Tramp çıxışında hadisəni kəskin şəkildə pisləyib:

“Bütün ölkəmizin yaşadığı acını və dəhşəti ifadə etmək istəyirəm. Dünən paytaxtımızda baş verən terror hücumu zamanı Qərbi Virciniya Milli Qvardiyasının iki əsgəri vəhşi bir cani tərəfindən vuruldu. Bu vəhşilik ölkəmizə daxil olan və ölkədə qalan insanlar üzərində tam nəzarətin təmin edilməsinin milli təhlükəsizliyimiz üçün ən əsas prioritet olduğunu bir daha göstərdi”.