Qalib Azərbaycanımızın qəhrəman Ordusu

Azərbaycanın siyasi tarixində 10 noyabr 2020-ci il tarixində imzalanmış üçtərəfli bəyanat dönüş nöqtəsi oldu. Ermənistanın 2020- ci ilin sentyabrın 27-də törətdiyi növbəti hərbi təxribat Azərbaycanın öz torpaqlarının azad edilməsi uğrunda əks hərbi-əməliyyatlara başlamasına səbəb oldu. Azərbaycan ordusu Ali Baş Komandan İlham Əliyevin rəhbərliyi ilə qısa müddət ərzində ən çətin döyüş tapşırıqlarını yerinə yetirərək Vətənimizin müdafiəsinə qalxdı . 44 günlük əks-hücum əməliyyatlarını müvəffəqiyyətlə başa vuran Ordumuz tarixi zəfərə imza atdı. Azərbaycan son iki əsrlik tarixində ilk dəfədir ki, müharibədən ərazi itkisi ilə yox, ərazi bütövlüyünü bərpa edərək çıxdı. Şanlı Ordumuzun əldə etdiyi tarixi zəfər dövlət və xalqımızın mənafeyi baxımından xüsusi əhəmiyyət kəsb edir. Uzun illərdən bəri düşmən tapdağı altında qalmış torpaqlarımızın işğaldan azad edilməsi Azərbaycan xalqının özünə inamını qaytardı, xalqın öz liderinə, onun gücünə etibarını daha da möhkəmləndirdi. Azərbaycan sülh qapılarını hər zaman açıq saxladı. Lakin münaqişə öz həllini tapmırdı. Bədxah qonşularımız fürsət düşən kimi hərbi təxribatlara əl atırdılar. Azərbaycan ordusu dövlətimizin ərazi bütöblüyünü qorumaq üçün hücuma keçdi.Tezliklə bütün dünya Azərbaycanın gücünü, işğalçı Ermənistanı ən qısa müddətdə məğlub etmək əzmini gördü. Azərbaycan Ordusunun möhtəşəm zəfərləri bütün dünyanı mat qoydu. Prezident İlham Əliyevin son 17 ildə həyata keçirdiyi millət quruculuğu prosesi ona gətirib çıxardı ki, Prezident-Ordu-Xalq birliyi qalib gəldi, düşmən 30 ildir işğal altında saxladığı torpaqlarımızdan qovuldu. Cəbrayılın, Füzulinin, Qubadlının, Zəngilanın, Xocavənd, Xocalı, Laçın, Tərtər rayonlarının kəndlərinin azad olunması, Xudafərində Azərbaycan bayrağının ucaldılması, İranla dövlət sərhədinə nəzarətin tam təmin edilməsi ordumuzun möhtəşəm qələbəsinin təntənəsinə çevrildi. Əsgərlərimiz cəbhənin elə bir sahəsi olmadı ki,hücum əməliyyatında ləngisinlər. Sevindirici haldır ki, bu qələbəni Azərbaycan Ordusunun şəxsi heyəti, əsgərlərimiz, zabitlərimiz, gizirlərimiz qazandılar. Ən böyük arzumuz Bütün ordumuzdan Qarabağın tacı və incisi olan Şuşanın azad edilməsi idi. Məhz Şuşanın azad olunması döyüşlərin kulminasiya nöqtəsi idi. Azərbaycan xalqının birliyi, müzəffər Ali Baş Komandanın dəmir iradəsi, sarsılmaz qətiyyəti, Şanlı Ordumuzun qüdrəti və qəlbi Vətən eşqi ilə dolub-daşan hərbçilərin, eləcə də hər bir azərbaycanlının monol birliyi sayəsində Azərbaycan xalqı zəfər qazandı. 44 günlük Vətən müharibəsi Azərbaycan Prezidentinin, xalqının və Ordusunun qələbəsidir! Azərbaycan xalqı Qarabağ arzusundan bir addım da geri çəkilmədiyini bu müharibədə əyani sübut etdi. Qarabağın millətimizin milli ləyaqət rəmzi olduğunu xalq öz Prezidentinin ətrafında sıx birləşməklə bütün dünyaya sübut etdi. “Dünyada heç bir qüvvə bizi haqq yolumuzdan döndərə bilməz. Dünyada heç bir ölkə bizim iradəmizə təsir edə bilməz. Biz haqq yolundayıq, biz qalib gəlirik, biz zəfər çalırıq və biz öz torpaqlarımızı geri alacağıq, ərazi bütövlüyümüzü bərpa edəcəyik!” -Prezident İlham Əliyev müharibənin gedişində dəfələrlə bu fikirləri bəyan etdi . Bu əminlik 44 günlük müharibədən Azərbaycanın qalib ayrılmasını şərtləndirdi. Azərbaycan 30 ildir məruz qaldığı təcavüzü aradan qaldırdı, döyüş meydanında olduğu kimi, diplomatiya arenasında da qalib gəldi. 

Ulu öndər Heydər Əliyevin təməlini qoyduğu ordu quruculuğu siyasətinin Azərbaycan Rpublikasının Prezidenti, Silahlı Qüvvələrin müzəffər Ali Baş Komandanı İlham Əliyev tərəfindən dövrün tələbləri səviyyəsində inamla, uğurla davam etdirilməsi qələbəmizin təminatı oldu. Ölkə başçısı tərəfindən ordu quruculuğu sayəsində ərsəyə gələn nizami Azərbaycan Ordusu dövlətçiliyimizin qarantı olmaqla yanaşı, ölkəmizin dünya miqyasında maraq və mənafeyinin, milli təhlükəsizliyinin lazımi səviyyədə qorunmasını, həmçinin müstəqil siyasət yeritməsini təmin etməyə imkan yaradıb. Azərbaycan Ordusunun qəlbi vətən eşqi ilə döyünən hər bir əsgər və zabitlərinin peşəkarlığı, yüksək mənəvi keyfiyyətləri, cəsurluğu, vətənpərvərliyi, inamı, şəxsi rəşadətləri, qələbə əzmi, döyüş əhval-ruhiyyəsi Vətən müharibəsində Zəfər qazanmağımızda böyük rolu oldu. Qələbəmizin birinci , əsas qəhrəmanı Azərbaycan əsgəridir. Azərbaycan Ordusu dünyanın hərb tarixinə yeni səhifə yazdı. Əzəli və əbədi torpağımız olan Qarabağ yenidən doğulur, yenidən cana gəlir.Tarixi torpaqlarımızı bizə qaytaran qalib , müzəffər ordumuza , Ali Baş Komandanımıza eşq olsun.Yaşasın Azərbaycan Ordusu! Qarabağ Azərbaycandır! 

Tofiq Əsgərov, 

Masallı RTŞ-nin əməkdaşı