"The Telegraph" Rusiya üçün sülh planının ən pis senarisini açıqladı: "Putin taxtdan salınacaq"

Qaynarinfo xəbər verir ki, bu barədə "The Telegraph” nəşrinin icmalçısı Hemiş de Bretton-Qordon  yazıb.

Analitik qeyd edir ki, Donald Trampın Ukrayna üzrə sülh sazişinin 95 faiz hazır olması barədə bəyanatları Moskvada aşkar təşviş yaradıb. Bu təşviş özünü Kremlin vərdiş etdiyi üslubda göstərib: kobud dezinformasiya və inandırıcı olmayan narrativlər. Putinin çoxsaylı saraylarından birinin bu həftə 91 dronla hücuma məruz qalması barədəki iddia bunun bariz nümunəsidir.

"MKİ (CIA) ABŞ prezidentinə məlumat verib ki, bu, demək olar ki, mütləq "yalançı bayraq” (false flag) əməliyyatıdır. Bu, Kremlin nəzarətindən sürətlə çıxan sülh prosesini pozmaq üçün kobud və birmənalı cəhddir. Putin üçün daha acınacaqlı olanı odur ki, onun öz əhalisi hadisələrin bu versiyasına şübhə etməyə başlayıb. Təbliğat ölkə daxilində çökəndə, rejimlər də tezliklə onu izləyir", – deyə Bretton-Qordon qeyd edir.

Müəllifə görə, Putin anlayır ki, onun əlində qalan yeganə rıçaq Tramp və Zelenski arasına nifaq salmaqdır. Lakin bu gün Tramp Kremlin manipulyasiyalarına bir neçə həftə əvvəlkindən daha az meyillidir. Bu da Ağ Evi Ukrayna üçün ideal olmasa da, Moskva üçün daha pis olan sülhə doğru aparır.

İcmalçı vurğulayır ki, ABŞ və NATO-nun 15 il üçün nəzərdə tutulan təhlükəsizlik zəmanətləri faktiki olaraq NATO müdafiəsi deməkdir. Kreml üçün daha narahatedici məqam isə Trampın Ukrayna ərazisində Qərb qoşunlarının olması ehtimalını açıq müzakirə etməsidir:

Cəbhə xəttinin dondurulduğu şəraitdə, Donbasdakı nadir tapılan minerallara çıxış barədə Kiyevlə Putin deyil, məhz Tramp danışıqlar aparacaq. Buna təzminatların ödənilməsi ehtimalını və Rusiyanın dondurulmuş 200 milyard dollarlıq aktivlərinin müsadirəsini də əlavə etsək, artıq "sərbəst düşüşdə" olan Rusiya iqtisadiyyatı getdikcə daha dayanıqsız görünür.

Analitik daha iki təzyiq faktorunu qeyd edir:

1. Hərbi gücsüzlük: Rusiya artıq anlayır ki, onun ordusu ABŞ iştirak etməsə belə, NATO-ya qarşı dura bilməz.

2. Neft qiymətləri: Neftin qiymətinin barrel başına 60 dollardan aşağı düşməsi ilə Rusiyanın hərbi maşınını qidalandıran maliyyə yanacağı sürətlə buxarlanır. Gəlir olmayanda silahlar susur.

"MKİ faktiki olaraq prezidenti Kremlin aldatmalarını görmək qabiliyyəti ilə təmin edib. İndi Tramp Putinin boğazından bərk yapışıb", – deyə Bretton-Qordon vurğulayır.

Nüvə eskalasiyası qorxusu qalsa da, Kremlin adi nüvə təhdidləri son həftələrdə demək olar ki, yoxa çıxıb. Moskva anlayır ki, "nüvə silahı şaqqıltısı" artıq Avropa liderlərini qorxutmur.

"Politico” nəşrinin yazdığına görə, Qərbin iqtisadi sanksiyalarına baxmayaraq, Putin hələ də öz maksimalist tələblərinə sadiq görünür. Nəşr hesab edir ki, Trampın səyləri ilə müharibənin bitmə şansı 4:1 nisbətindədir.

Eyni zamanda, "Washington Post” (WP) yazır ki, Donald Tramp müharibəni dayandırmağa çalışsa da, Ukrayna və Rusiya arasındakı fundamental ixtilafları hələ tam anlamır.