Mədədəki bu bakteriya qaraciyəri də məhv edir

Mədə qastriti və xorasının əsas səbəblərindən biri hesab olunan Helikobakter pilori bakteriyası qaraciyərin piylənməsi riskini də artıra bilər.

Sehiyye.info xəbər verir ki, Çin alimləri belə nəticəyə gəliblər.

"Frontiers in Nutrition" jurnalında dərc olunan tədqiqat çərçivəsində alimlər təxminən 6 min nəfərin məlumatlarını təhlil ediblər. Araşdırmada həm Çin klinikalarından olan 1000-dən çox pasiyentin, həm də ABŞ-ın NHANES proqramında iştirak edən 5 minə yaxın şəxsin göstəriciləri öyrənilib.

Mütəxəssislər Helikobakter pilori infeksiyasının mövcudluğunu və metabolik pozğunluqlarla əlaqəli qaraciyərin piylənməsi xəstəliyinin (MASLD) əlamətlərini qiymətləndiriblər. Bu xəstəlik zamanı qaraciyərdə yağ toplanır ki, bu da iltihab, sirroz və digər ciddi fəsadların yaranması riskini artırır.

Təhlilin nəticələrinə görə, Helikobakter pilori bakteriyasına yoluxmuş şəxslərdə qaraciyərin piylənməsi ehtimalı əhəmiyyətli dərəcədə yüksək olub. Alimlər bildiriblər ki, yaş, cins, bədən kütlə indeksi, şəkərli diabet və xolesterin səviyyəsi kimi amillər nəzərə alındıqdan sonra da bu əlaqə özünü qoruyub saxlayıb.

Tədqiqat müəlliflərinin fikrincə, bakteriya maddələr mübadiləsinə təsir göstərə və orqanizmdə xroniki iltihabı gücləndirərək xəstəliyin inkişafına şərait yarada bilər.//publika