Gömrük Akademiyası Qırğız Respublikası Dövlət Gömrük Xidmətinin əməkdaşları üçün təlimlər təşkil edir

Dövlət Gömrük Komitəsinin Akademiyası Qırğız Respublikası Maliyyə Nazirliyi yanında Dövlət Gömrük Xidmətinin əməkdaşları üçün təlimlərə başlayıb. Təlimlər Azərbaycan Respublikasının Dövlət Gömrük Komitəsi ilə Qırğız Respublikası Hökuməti yanında Dövlət Gömrük Xidməti arasında imzalanmış 14 iyun 2017-ci il tarixli “Kadrların peşəkar hazırlığı və ixtisasının artırılması sahəsində əməkdaşlıq haqqında” Protokola əsasən təşkil edilir.

İki il ərzində Akademiya tərəfindən Qırğız gömrükçüləri üçün müxtəlif mövzular üzrə təlimlərin təşkili nəzərdə tutulur. Təlimlərdə azərbaycanlı mütəxəssislər müvafiq sahədəki təcrübələrini qırğızıstanlı həmkarları ilə bölüşürlər.

İlk təlimlər “Gömrük nəzarətinin səmərəli həyata keçirilməsi üsulları” mövzusunda təşkil edilib və təlimlərin ilk günüAzərbaycan Respublikasının gömrük sərhəd buraxılış məntəqələrində həyata keçirilən prosedurlar və əməliyyatlar mövzusuna həsr olunub. Təlimdə DGK-nın Gömrük Sərhəd Buraxılış Məntəqələrinin İşinin Təşkili Baş İdarəsinin Sərhəddə prosedurların tətbiqi və monitorinqi şöbəsinin baş inspektoru, gömrük xidməti kapitanı Emin İsmayılov Azərbaycan Respublikasının gömrük sərhəd buraxılış məntəqələrində həyata keçirilən prosedurlar və əməliyyatlar, o cümlədən Azərbaycan Respublikasının sərhəd gömrük orqanlarında mal və nəqliyyat vasitələrinin qeydiyyatının bir pəncərə prinsipi əsasında həyata keçirilməsi haqqında təqdimat ilə çıxış edərək təlim iştirakçılarına ətraflı məlumat verib.

Təlimin sonunda mövzu ətrafında müzakirələr aparılıb, iştirakçıları maraqlandıran suallar cavablandırılıb.

Qeyd edək ki, Qırğız Respublikası Maliyyə Nazirliyi yanında Dövlət Gömrük Xidmətinin əməkdaşları üçün “Gömrük nəzarətinin səmərəli həyata keçirilməsi üsulları” mövzusu üzrə praktiki təlimlər cari ilin 14 noyabr tarixindən 18 noyabr tarixinədək onlayn formatda davam edəcəkdir.