İtaliyanın Barselona və Berlindəki diplomatik nümayəndəliklərinə qarşı hücumlar olub

İtaliyanın Barselonadakı Baş konsulluğuna və Berlindəki səfirliyinə qarşı hücumlar olub.

AZƏRTAC xəbər verir ki, İtaliyanın Xarici İşlər və Beynəlxalq Əməkdaşlıq Nazirliyi ötən gecə Barselonadakı Baş konsulluğun binasının naməlum şəxslər tərəfindən hücuma məruz qaldığını, konsulluğun yerləşdiyi binanın pəncərəsinin sındırıldığını bildirib. Həmçinin dünən gecə saatlarında İtaliyanın Berlindəki səfirliyinin əməkdaşının diplomatik nömrə nişanlı avtomobili yandırılıb. Yerli polis qüvvələri tərəfindən lazımi tədbirlər görülüb, hər iki hadisədə xəsarət alan olmayıb.

İtaliyanın Baş naziri Ciorcia Meloni diplomatik nümayəndəliklərə qarşı bu yeni zorakılıq hallarını narahatlıq və diqqətlə izlədiyini deyib.

Xarici işlər və beynəlxalq əməkdaşlıq naziri Antonio Tayani isə dərhal Berlindəki səfirlik və Barselonadakı konsulluqla əlaqə saxladığını bildirib. Nazir bu cinayət əməllərinə mümkün qədər tez aydınlıq gətirilməsini tələb etdiyini vurğulayıb və diplomatik nümayəndəliklərdə təhlükəsizliyin artırılması ilə bağlı tapşırıq verib.