Xəbər Lenti
05 dek 18:38Gündəm / Siyasət

Bölgədə sabitliyin möhkəmləndirilməsinə yönəlmiş hərbi təlimlər – ŞƏRH

Azərbaycan-Türkiyə birgə hərbi təlimlərinə start verilməsi, genişmiqyaslı təlimlərin müxtəlif qoşun növlərini və Şərqi Zəngəzurdan cənub sərhədlərimizədək müxtəlif arealları əhatə etməsi bölgənin təhlükəsizliyi naminə ciddi hadisədir. Xüsusən cənubdan İranın qeyri-adekvat davranışları, o cümlədən Ermənistanın, habelə Paris, Tehran və İrəvanın təhriki ilə Qarabağ İqtisadi rayonundakı separatçıların son ritorikası fonunda Ankara-Bakı hərbi tandemi proseslərə ən uğurlu cavabdır. Çünki regionda qüvvələr balansı siyasi bəyanatlara yox, real hərbi gücə, o cümlədən konkret hərbi imkanlara əsaslanan siyasi nüfuza görə müəyyən olunur. Məhz bu təlimlərlə Azərbaycan və Türkiyə bir daha bölgənin real hərbi-siyasi gücünün kim olduğunu göstərməkdədir.
Bunu AZƏRTAC-a açıqlamasında Milli Məclisin deputatı Bəhruz Məhərrəmov söyləyib.
Onun sözlərinə görə, bu təlimlər Xankəndiyə diversant göndərən, habelə bir müddət öncə Arazboyu cənub sərhədlərimizdə təlimlər keçirməklə bizi təhdid etmək istəyən İran üçün reallığa dəvət hesab oluna bilər. Belə ki, noyabrın 25-i ADA Universitetində baş tutan beynəlxalq konfransda Prezident İlham Əliyev bəyan etmişdi ki, "Azərbaycana və ya Türkiyəyə qarşı məkrli planları olanlar bilməlidirlər ki, türk ordusu tək deyil, orada, həmçinin bizim ordu da var. Bizim ordu isə tək deyil, o cümlədən orada türk ordusu da var". Bu mənada, başlanan genişmiqyaslı birgə təlimlərimiz göstərir ki, Ankara və Bakının iradəsi yalnız bəyanatlarla məhdudlaşmır, biz əməli olaraq birik. Üstəgəl müasir döyüş üsullarından istifadə etməklə artilleriya, aviasiya və digər qoşun növlərinin hərbi əməliyyatlarda tətbiqi, onların qarşılıqlı əlaqədə fəaliyyətinin təşkili, çaylar üzərindən keçid açmaq məqsədilə panton körpülərin salınması, şərti düşmənin dərinliyinə desant endirilməsi üzrə müxtəlif tapşırıqlar da icra edilməsi ilə biz həm də təlimlər necə keçirilir, dağlar, digər çətin keçilən ərazilər, ələlxüsus da çaylar lazım gəlsə necə keçilə bilir hər kəsə göstərməkdəyik.
“Birgə təlimlər həm də o reallığı üzə çıxarır ki, regionda özü kimi “fail state” olan Ermənistandan başqa müttəfiqi olmayan İrandan fərqli olaraq Bakı Türkiyənin timsalında hər an yanında qərarlaşacaq müttəfiqlərə sahibdir. Bu gün Türkiyə ilə olduğu kimi sabah qardaş İsrail, o biri gün Pakistan, Səudiyyə Ərəbistan və sair olmaqla ölkəmizin istənilən ərazisində, arzu etdiyimiz istənilən formatda, istənilən miqyasda hərbi təlimlər keçirə bilərik. Hər kəs, o cümlədən İran, əgər daxildəki xalq hərəkatı molla rejimini çökdürməzsə bu proseslərə hazır olmalıdır”, - deyə Bəhruz Məhərrəmov vurğulayıb.
“Amma bütövlükdə yanaşsaq birgə təlimlərimiz Azərbaycan və Türkiyə arasında bağlanmış hərbi sahədə əməkdaşlıq haqqında sazişə, o cümlədən Şuşa Bəyannaməsinin konsepsiyasına uyğun olaraq keçirilir və bölgədə təcavüzkar, irticaçı mövqe tutmayan, terror-təxribat təhlükələri yaratmayan, davamlı sülh üçün maneə törətməyən heç bir dövlətin bu güc göstərişindən narahat olmasına əsas yoxdur. ADA Universitetində Prezident İlham Əliyevin də qeyd etdiyi kimi, "Türkiyə ilə Azərbaycan arasında iş birliyi və onların birgə fəaliyyəti bölgədə sabitliyin möhkəmləndirilməsinə yönəlib". Amma, eyni zamanda, açıq formada bəyan edirik ki, əksinə bölgədə pozucu fəaliyyətə köklənən, mümkün sülhə təhdid yaradan, əməkdaşlıq mühitini korlamağa çalışan, xüsusən Azərbaycana və Türkiyəyə qarşı xoş niyyət güdməyən hər bir qüvvə, hər bir subyekt bu təlimlərdən, Bakı-Ankara qardaşlığından narahat olmaqda haqlıdır. Biz bütövlükdə bölgənin mənafelərinə, rifahına xidmət edən, beynəlxalq hüququn ümumtanınmış prinsiplərini rəhbər tutan milli maraqlarımızı nəyin bahasına olur-olsun tam həyata keçirməkdə davam edəcəyik”, - deyən deputat fikirlərini yekunlaşdırıb.
© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin